Racizmi në sportet në Maqedoninë e Veriut nuk ndalet: Thirrje fyese në ndeshjen Pelister – Shkupi në Kavadar
Thirrjet raciste në stadiumet e Maqedonisë së Veriut vazhdojnë të shqetësojnë publikun. Rasti i fundit u regjistrua në Kavadar gjatë ndeshjes së Ligës së Parë të Futbollit mes KF Pelister dhe KF Shkupi, ku disa tifozë brohoritën refrenin fyese: “Le ta kuptojnë shqiptarët e mallkuar, emri maqedonas nuk do të zhduket”.
Federata e Futbollit e Maqedonisë së Veriut reagoi menjëherë, duke njoftuar se KF Pelister është dërguar në Komisionin Disiplinor për procedurë të mëtejshme. “Raporti ka të bëjë me brohoritje fyese nga disa tifozë në ndeshjen Pelister – Shkupi,” thuhet në njoftimin e FFM-së.
Portalb.mk kërkoi reagim edhe nga Ministria e Punëve të Brendshme, por deri më tani nuk ka pasur një përgjigje konkrete. Ky incident vjen vetëm një muaj pas ngjarjes së ngjashme në Kumanovë gjatë ndeshjes parakualifikuese për Kampionatin Botëror të basketbollit mes Maqedonisë së Veriut dhe Rumanisë, ku u dëgjuan thirrje raciste dhe kërcënime ndaj shqiptarëve.
Kryetari i Kuvendit, Afrim Gashi, ka kërkuar veprim të shpejtë nga institucionet: “Institucionet duhet t’i gjejnë fajtorët dhe t’i dënojnë. Le ta dinë njerëzit se nuk mund të ketë thirrje të tilla, sepse siç e pamë shkaktuan shqetësime në publik.”
Ekspertët e komunikimit politik dhe organizatat për gjuhën e urrejtjes paralajmërojnë se mosreagimi adekuat nga policia dhe prokuroria ushqen më tej gjuhën e urrejtjes, duke krijuar precedent për incidente të ngjashme.
Ky është një tjetër sinjal shqetësues për institucionet dhe shoqërinë në përgjithësi, që rastet e urrejtjes në sporte duhet të trajtohen me vendosmëri dhe pa vonesa.
